అద్భుతలీలల ఆంతర్యం?

నా పెళ్ళి , మా ఆడపడుచు పెళ్ళి ఆరు రోజుల తేడాతో జరిగింది. ఒక ఆదివారం వాళ్ళు నవ దంపతులే కదా అందరూ కలిసి సరదాగా ఎటైనా వెళ్దామని అనుకొని వాళ్ళింటికి వెళ్ళాము. ఎటైనా వెళ్ళడం సంగతి పక్కన పెడితే, ఆడపడుచు వాళ్ళ తోడికోడలింటికి తీసుకెళ్ళింది నన్ను ఏదో పనుందని, వెళ్ళేముందు విషయమేంటి అనేది చెప్పలేదు కాని, వెళ్ళిన తరువాత అనుకోకుండా "వదినా వీళ్ళింట్లో ఒక అద్భుతం జరుగుతుంది చూస్తావా" అని అడిగింది. ఈ అద్భుతాలు అవి నా ఊహకి అందని విషయాలు కాబట్టి , కొంచం ఆసక్తి కనబరిచి "ఊ సరే" అన్నాను. ఆవిడ రండి అంటూ వాళ్ళ దేవుడి మందిరానికి తీసుకెళ్ళి "ఇదిగో ఇదే ఆ అద్భుతం " చూపించారు. ష్.... ష్.... ష్...! నాది కొంచం మట్టిబుఱ్ఱ అక్కడ అధ్భుతమేంటో నాకు తెలియలేదు. అడిగితే మనల్ని ఏమనుకొంటారో అని సంశయిస్తూ ఉండగా కాగల కార్యం గంధర్వులే తీర్చారు అన్నట్లుగా ఆవిడే అన్నారు , " అసలెలా వస్తుందో తెలీదండి, రోజు రోజుకి ఆయన శిరసునుండి పాదంపై అలా విభూది ధారలు వస్తూ ఉంటుంది. మేము కళ్ళార చూడలేదంటే నమ్మండి, రెండు మూడు సార్లు కళ్ళార చూద్దామని ఎంతో ఆసక్తిగా జాగరణ కూడా చేసినా, కళ్ళార మటుకు చూడలేకపోయాము " అని అనడం చూసి అప్పుడు చూసా.. పెద్ద బాబా విగ్రహం పాదాల నుండి ఆయన మోకాలి దాకా వీభూధి.. అదే అద్భుతం.. నేనేమి షాక్ అవలేదు కాని, అర్థం కాక ఆలోచించలేదు అంతే.

******

పై సంఘటన తరువాత ఇదిగో ఇన్నాళ్ళకి, మావారి పుణ్యమా అని టి .వి లో భక్తి ఛానల్స్ తో సంబంధ బాంధవ్యాలు కాస్త ఎక్కువై.. మొన్నామధ్య "చూడు చూడు ఆ బాబా వారి లీలలు " అంటూ ఎక్కడో పనిచేసుకొంటున్న నన్ను అరిచి, గీపెట్టి పిలిచి పక్కన కూచొబెట్టుకొని, ఆ అద్భుత సంఘటనలకి తను తన్మయులై ....నన్ను తన్మయురాల్ని చేసే ప్రయత్నంలో భాగంగా ...హారతద్దుకొన్నట్లు అక్కడ కనిపించిన ప్రతి పటానికి భక్తి పారవశ్యంతో కళ్ళకద్దేసుకొంటూ "ఆహ.. ఒహో.. : అంటూ ఉంటే, ఎంటా ! అని చూశా..

బోధన్‌లో ఎవరో ఇంట్లో బాబావారి పటం నుండి, రమణానంద మహర్షుల వారి పటం నుండి వీభూధి, కుంకుమ, తేనే, గంధం దారాలు గా పడడం, జనం తండోప తండాలుగా ఆ వింత చూడడానికి రావడం.. ఇక్కడ కూడా ప్రత్యక్షంగా ఎవరు చూడలేదు కుటుంబ సభ్యులు లేచే సమయానికి అక్కడ పటాలనుండి గుట్టలు గుట్టలుగా పడి ఉండడం.. అద్భుతం కదా! (అవునా?).

******

అసలు ఇలాంటి లీలల వల్ల ఉపయోగం ఏంటి?

భగవంతుడికి అందరూ సమానమైనప్పుడు, ఇలా బోధన్లోనో, లేక మా అడపడుచు తోడికోడలి ఇంట్లో మాత్రమే ఇలాంటి లీలలు ఎందుకు జరుగుతున్నాయి? మరి నేను కూడా నాకు ఊహ తెలిసినప్పటినుండి అమ్మ చెప్పిందనో, లేక ఇంకెవరో చెప్పారనో దేవుడిని పూజిస్తూ ఉన్నానే, పూజిస్తున్నాను అంటే ఇలాంటి అద్భుత శక్తుల కోసం కాదు, అసలు, ఊహ తెలిసినప్పటికి ఈ లీలల విషయం నాకు తెలీదు. చెప్పాలంటే అవసరానికి దేవుడు, కష్టాల్లో దేవుడు అనుకొనే టైంలో "దేవుడా! దేవుడా ! నేను ఆరోతరగతి పాస్ అయిపోవాలి, ఎప్పుడు ఆ చిట్టిరాణికి ఎక్కువ మార్కులు వస్తాయి ఈ సారి నాకు రావాలి అనో , ఒకవిధంగా స్వార్ధమే అయినా నిష్కల్మషంగానే పూజించానుగా, పోని ఆ తరువాత బాగా తెలిసొచ్చిన తరువాతే అనుకొందాము, మరే విధమైన ఆలోచనో.. అవసరమో లేకుండానే పూజించాను, మరి మా ఇంట్లో ఇలాంటి అద్భుతాలు, లీలలు ఎందుకు జరగవు? ఇదంతా పక్కన పెడితే, ఏకాదశి, ద్వాదశి, కార్తిక మాసం, మాఘమసం, ఇంకోటంటూ, ఇంకోటంటూ 365 రోజులు ఏదో ఒక పూజ చేస్తూ సదా భగవద్యానంలో మునిగే అమ్మా వాళ్ళింట్లో ఏ లీలలూఊ?

అసలీ లీలలు, అద్భుతాలు అంటేఅ ఇంకో విషయం గుర్తొస్తోంది. ఆ మధ్యెప్పుడో మా ఇంటి దగ్గిర ఎవరో స్వామీజి వస్తున్నారని అందరు ఉరుకులు పరుగులు పెడ్తుంటే నాకు కూడా అసలు స్వామీజి భోధలేవో వినాలన్న కుతూహలం కలిగింది. అందుకని మా వాళ్ళనెవర్నో తోడు రమ్మని అడిగితే, "ఆ! ఎందుకండి బాబు, మన మనసులో ఉన్నవన్నీ చెప్పేస్తారు నలుగురి మధ్య, మనం మర్చిపోయిన తప్పులు కూడా "నువ్వు ఫలనా వయసులో ఫలనా తప్పు చేసావు ఆ తప్పుకి ఇప్పుడు ప్రాయశ్చిత్తం చేయడానికే నేను వచ్చాను" అంటారు.. ఈ గొడవంతా మనకెందుకండి" అని అంది. ఈ తప్పుల ఆంతర్యం మీకర్థమయ్యిందా? ఏమో! ఇంట్లో మామూలు యాంత్రిక జీవితానికి సంబంధించో, జీతాల లావాదేవిలో తప్ప , మధ్యతరగతి మహిళలు ఒక స్వామీజి ఎత్తి చూపించేంత తప్పులేమి చేస్తారో ... నాకయితే అర్థం కావడం లేదు.

ఒకళ్ళు ఎత్తి చూపనవసరంలేకుండా, ఏ అద్భుత హడావిడి లేకుండా ఉదయాన్నే ప్రశాంత చిత్తంతో భగవంతుడికి గుడ్ మార్న్ ంగ్ చెప్పేసి ఉద్యోగాల‍కి వెళ్ళడం అంత హాయి ఇంకోటి లేదు కదా. ఈ అద్భుతాల హడావిడికన్నా. అందుకేనేమో ఆ భగవంతుడు ఈ లీలలు మనిళ్ళదాకా రానీడు. ప్రశాంతంగా , ఆనందంగా ఆయనకి ధన్యవాదాలు తెలిపేద్దాం.

ఇహ ఇవి కాక నా దృష్టిలో అద్భుతం అంటే చిన్నపిల్లలు చకా చకా ఒక్క అక్షరం పొల్లు పోకుండా ఏకసంధాగ్రాహిలా చదివినది చదివినట్లు గుర్తుంచుకొని ఓ నాలగు పేజీలు అంతా ఒక్క సెకన్ తేడాతో చెప్పడం అత్యంత అద్భుతం. అలాగే అక్కడెక్కడో చిన్న పాప ఎంత పెద్ద సంఖ్యలనన్నా ఇట్టే కూడి జవాబు చెప్పడం ఒక లీల. జి టీవీ ఆటలో "గీతిక " అనే పసిపాప ఎలాంటి పాటకైన చక్కటి ప్రతిభ కనబరుస్తూ హావభావాలలో అద్భుతం అనిపించేలా నృత్యం చేయడం చాలా గొప్ప విషయం. ఆ లీలలు గొప్పా? ఇది గొప్పా? అంటే మౌనం మంచిదని నా అభిప్రాయం. ఎందుకంటే ఎవరి అభిప్రాయలనైనా గౌరవించాలి కాబట్టి ..
*******